沪语朗读：郭莉
朗读者手艺来源：解放日报朝花
作者：程果儿
沪语改写：郭莉
朗读：刘时医
推荐：丁迪蒙我拎仔一双跳舞鞋子，去寻伊面一对做生活个。
女个是踏缝纫机个，为大家补补衣裳、修修拉链、钉钉纽子咾啥。从前辰光，搿种地方侪是单身男人来照应生意，现在倒是蛮多人侪离勿开伊了。年轻个女人老少会得去动针线，衣裳三年穿勿到就厾脱了，还要缝缝补补做啥。难板需要改改弄弄、收收脱开个线脚嘛，还是要寻迭眼做生活个。伊身边停了部*鱼车，车子里向个是勿能立等可取，要带转去做个生活。我常庄来寻伊，因为我儿子个裤子、衣裳咾啥是经常需要伊帮忙修修补补个。
伊个身边还有个男人，是修鞋子个，人长得黑黜黜，胖笃笃个。伊拿鞋子轧好勒机器浪向，一只手摇把手，另外一只手就转动鞋子，线就咬到鞋帮里去了，比用胶水粘要好交关。男人个手节头圆滚滚个，粗糙开裂，修鞋子总归要用到胶水，搭勒肉浪是有腐蚀性个。
伊拉两个人各做各个，并勿是一家门。
我迭歇辰光晓得自家手里搿双鞋子个修补过程：一只鞋子个后跟浪向个垫子落脱了，要先拿鞋跟个底部磨平，再拿一小块橡胶贴上去，用胶水固定，然后用刻刀沿牢鞋跟个边缘切割，让贴上去个一块搭鞋子本身个形状基本一致。乃末花个三五块洋钿，一双鞋子就又可以着了。
裁缝女人搭仔修鞋子个男人，勒我个印象里是总归是勒一道个。搿只角落，热天介有阴凉，冷天介也没啥冷风。但是今朝啊，伊拉两介头竟然侪勿勒海，墙角伊面是空勒海个。
我记得，勿远地方还有搿能介个摊头个，就穿过一条马路，真个有个，也是补衣裳修鞋子两只摊位，只不过两家头距离远一眼。
我跑到修鞋子个老头搿搭排队。我看老头子：瘦是瘦得来，脚馒头浪摆件绿*装做挡布，鞋子就摆勒上头，衣裳浪向侪是龌龊。只看见伊一针又一针，扎得是又准、又快。老鞋匠拿橡胶皮子固定、切好，再拿出三根绝绝细个洋钉敲进去，迭个呢，是更加老派个做法，我屋里附近个伊位师傅从来勿搿能做个。我付了铜钿以后，笑嘻嘻个搭伊讲了声“侬忙，我先走了”，伊呢，只是“嗯嗯”两声，点点头。我个心里邪气开心，今朝夜里，我又可以着仔搿双鞋子去跳舞了呀。
我勒此地住了十几年了，还认得其他一眼做生活个手艺人。修车师傅个指掐里，总归是汏勿脱个黑油灰，有得好几趟，我是勒人家个指点下头寻着伊个。我耐心个坐勒边头，看伊拿内胎摆到水盆里向，通过气泡寻着漏气洞眼个位置。身浪个汗慢慢叫吹干了，我心里笃笃定定个，晓得自家用勿着急吼吼推仔车子回去了。呒没车子修个辰光呢，几个师傅就坐勒一道听听半导体。伊拉侪是邪气黑个皮肤，头发花白，也已经老少了。伊拉闲话少来西个，也勿欢喜动，安安静静个蹲勒一道作伴。
还有只露天个修表摊头，勒家超市个外墙边头。勒三面镶玻璃个移动柜台里向，修表师傅托牢自家只大肚皮，安静个靠墙坐勒海。现在戴表个人已经勿大多了，所以呢，蛮少看到有人来修表。再讲，要是上千上万块个手表，好像也舍勿得拿来拨伊修。我呒没仔细看过伊个摊头，但是我晓得，伊搿搭一定有只圆圆个放大镜，一大把迷你型个螺丝刀。唉，要等多少日脚，迭眼工具再可以深入一只手表个身体内部呢？
迭眼呒没固定铺面个生艺人，一定比别人家老得更加快。伊拉每日天勒路边吃灰、吹风、晒太阳。讲勿定，也可以调来做做其他生活个，但是一辈子已经选定个手艺，倒是也是厾勿脱个了。
当然，也有交关时髦个做生活个手艺人，譬如勒蛋糕上头裱花、勒头浪向染出五颜六色、或者让女人个指掐增辉闪光……伊拉迭眼手艺生活，侪是指向未来个，看了勿会叫人心里惆怅。
但是啊，伊眼连接阿拉搿代人往事回忆个手艺人，再也跟勿上城市奔跑发展个节奏，只好安安静静个守牢自家个摊头，勿晓得阿里一天，阿拉就再也看勿见伊拉了。
方言是文化的活化石。每种语言都能表达出使用者所在民族的世界观、思维方式、社会特性以及文化、历史等，都是人类珍贵的无形遗产。当一种语言消失后，与之对应的整个文明也会消失。保护汉语方言，有利于人类文明的传承与发展和社会安定。在上海，爱上海，讲上海言话。“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。
“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”
图：网络
编辑：渺渺
预览时标签不可点收录于话题#个上一篇下一篇